Синоќа излезе ноемвриската ранг-листа на ФИФА на која репрезентацијата на Сан Марино се најде закована на самото дно.
„Момците испишаа историја за прв пат постигнувајќи три гола во низа и наместо да нѐ поддржат, тие нѐ уназадија три места. Неверојатно“, пишува фан-страницата на најслабата европска репрезентација.
„Уште па пред нас се Гибралтар, кој прими 20 гола на два натпревара, земја со име на риба, Ангвила, и два острова девици (се мисли на Британски Девствени Острови и Американски Девствени Острови). Мафијашка работа на ФИФА, го покрадоа Сан Марино“.
Сан Марино претходно беше на 207. место, а сега е на 210-то. Но, тоа не е поради резултатите, туку бидејќи во претходните рангирања не беа вклучени три неактивни репрезентации (Самоа, Американска Самоа и Тонга) кои сега се вклучени бидејќи одиграа натпревари.
Згора на тоа, навистина Сан Марино минатиот месец имаше подобри резултати од Гибралтар, кој загуби со 14:0 (Франција) и 6:0 (Холандија), за разлика од Сан Марино која загуби 3:1 (Казахгстан) и 2:1 (Финска), но рангирањето се прави како комбинација од претходните и сегашните резултати, не само сегашните. Дополнително, бодови се добиваат за победа и реми, а не за постигнати голови. Санмаринците имаат 5,27 бодови помалку од октомвриското рангирање.
Сан Марино на последните 11 натпревари има 11 порази, а последниот успех, и тоа реми, му беше на 17 ноември 2022 кога одигра 1:1 на пријателска со карипската островска држава Св. Луција.
