Жрепката за сите европски клупски натпреварувања ќе се одржи денеска во Нион, а навивачите најмногу ги интересира извлекувањето на паровите за осминафиналето во Лигата на шампионите кое ќе се одржи точно на пладне по средноевропско време.
Денеска во седиштето на УЕФА во Нион ќе се одржи жрепката за нокаут-фазата од Лигата на шампионите, Лига Европа и Европа конференциската лига. Од час во час извлекувањата ќе се одржуваат по тој редослед од 12, 13 и 14 часот.
Победниците на групите во овосезонското издание на Лигата на шампионите ќе бидат носители, додека второпласираните ќе бидат, на хартија, во подредена позиција. Ограничувањата за жрепката се исти како и сите претходни години и во нив се наведува дека во оваа фаза не можат да се сретнат клубови од исти земји, ниту клубови кои играле во иста група.
Носителии: Арсенал (Англија), Атлетико (Шпанија), Баерн (Германија), Барселона (Шпанија), Борусија Дортмунд (Германија), Манчестер Сити (Англија), Реал Мадрид (Шпанија) и Реал Сосиедад (Шпанија).
Неносители: Копенхаген (Данска), Интер (Италија), Лацио (Италија), Лајпциг (Германија), Наполи (Италија), Пари Сен-Жермен (Франција), Порто (Португалија) и ПСВ (Холандија).
Осминафиналето во Лигата на шампионите ќе се игра во текот на четири недели. Првите натпревари се закажани за 13/14 и 20/21 февруари 2024 година, а реваншите на 5/6 и 12/13 март.
Манчестер Сити е бранител на титулата, а и сезонава важи за прв фаворит во најелитното клупско натпреварување. Со шест победи во исто толку натпревари во групната фаза, избраниците на Пеп Гуардиола ја истакнаа најголемата кандидатура за нова шампионска титула.
Жрепката за осминафиналето во Лигата на шампионите ќе се одржи од 12 часот со директен ТВ пренос на Arena Premium 1. Можете да го следите и на стрим официјалната веб-страница на УЕФА (линк).
Нокаут-фазата во Лига Европа е малку поинаква од Лигата на шампионите, но е иста како и лани. Почнува со плеј-оф кој ќе ги даде осумте квалификанти кои во осминафиналето ќе им се придружат на победниците од групите. Во плеј-офот носители се второпласираните од групната фаза, додека неносители се сите оние што како третопласирани од Лигата на шампиони продолжуваат во Лига Европа.
Носители: Карабаг (Азербејџан), Олимпик Марсеј (Франција), Рен (Франција), Рома (Италија), Спарта (Чешка), Спортинг (Португалија), Тулуз (Франција) и Фрајбург (Германија).
Неносители: Бенфика (Португалија), Брага (Португалија), Галатасарај (Турција), Јанг Бојс (Швајцарија), Ланс (Франција), Милан (Италија), Фејнорд (Холандија) и Шахтар (Украина).
И тука важи правилото дека тиумови од иста земја не може да се паднат.
Жрепката за Лига Европа исто така ќе оди на Arena Premium 1, но од 13 часот. Пренос ќе има и на стрим на УЕФА (линк).
Конференциската лига го следи форматот на Лига Европа. Се игра прво плеј-оф за кој во жрепката ќе учествуваат второпласираните од групите и третопласираните од Лига Европа. Осумте победници ќе обезбедат пласман во осминафиналето каде ги чекаат победниците на групите.
Носители: Ајнтрахт (Германија), Боде/Глимт (Норвешка), Гент (Белгија), Динамо (Хрватска), Легија (Полска), Лудогорец (Бугарија), Слован (Словачка) и Ференцварош (Унгарија).
Неносители: Ајакс (Холандија), Бетис (Шпанија), Макаби Хаифа (Израел), Молде (Норвешка), Олимпиакос (Грција), Сервет (Швајцарија), Унион (Белгија) и Штурм (Австрија).
И конференциската жрепка ќе се поренесува на Arena Premium 1, од 14 часот, а пренос ќе биде стримуван и на УЕФА (линк).
Важат истите правила за забрана на клубови од иста земја.
