Sony претстави два нови Walkman уреди: NW-ZX700 и NW-A300.
Ако знаете која е поврзаноста меѓу пенкалата и аудиокасетите, тогаш сигурно знаете за легендарниот Walkman.
Верувале или не, овој уред е сè уште жив, само што повеќе не пушта касети или, како што беше случајот во подоцнежните изданија, CD-а, туку работи со Android и го нуди целиот шарм на овој оперативен систем, а Sony штотуку претстави два нови модели : NW-ZX700 и NW-A300.
Ако се прашувате која е поентата на овие уреди, особено кога нашите смартфони нудат иста функционалност, одговорот е дека Sony нуди подобро слушачко искуство благодарение на различните компоненти кои служат за што е можно поверно репродуцирање на звукот, што значи дека Walkman плеерите се наменети за аудиофили, за сите што се чувствуваат така, но и за оние кои сакаат да носат парче носталгија во џебот.
Поевтиниот од овие два модели, NW-A300, чини 399 евра, а има димензии 56,2 x 98,5 x 12 мм. На предната страна на уредот има 3,6-инчен LCD екран со резолуција од 1.280 x 720 пиксели, а поддржува и Wi-Fi 5 и Bluetooth 5 конекција. Кога станува збор за портите, тука е USB-C, кој го исполнува стандардот USB 3.2 Gen 1 и 3,5 милиметарски конектор. Внатрешната меморија од 32 GB може да се прошири со microSD картичка.
За жал, Sony не откри кој чипсет го напојува овој уред, но знаеме дека се работи за процесор на Qualcomm поврзан со 4GB RAM. Sony ветува дека корисниците ќе можат да слушаат FLAC-датотеки од 44,1 kHz 36 часа или дека автономијата е до 32 часа за FLAC-датотеки од 96 kHz.
За разлика од поевтиниот модел, NW-ZX700 сè уште нема да биде лансиран во Европа, а неговата цена е 104.500 јени (околу 750 евра), што дефинитивно е цифра што ќе бидат подготвени да ја платат само вистинските аудиофили. Sony ја оправдува оваа цена со додавање на напреден аудиозасилувач и големи кондензатори кои го хранат аналогниот аудио излез.
NW-Z700 се напојува со чипсет Qualcomm QCS4290, со осум јадра Kryo 260 и графика Adreno 610. Овој модел на чип нема да го видите во смартфоните, бидејќи нема можност за поврзување на мобилна мрежа, но според останатите спецификации кои ги нуди, може да се заклучи дека е многу блиску до чипсетот Snapdragon 662, кој, на пример, се содржи во телефонот Honor 50 Lite.
На предната страна на уредот има 5-инчен LCD екран со резолуција од 1.280 x 720 пиксели и брзина на освежување од 60 Hz. Во споредба со A300, овој модел нуди помала автономија на батеријата - 23 часа слушање музика - но претпоставуваме дека тоа е цената што треба да се плати за напојување на помоќните компоненти за репродукција на звук. За бараните пари добивате и два аудио излези: балансиран излез од 4,4 мм и конектор од 3,5 мм. Внатрешната меморија од 64 GB може да се прошири со помош на microSD картичка.
Во овој, но и поевтиниот модел, има S-Master HX чип, кој поддржува NativeDSD аудио формат со висока резолуција. За оние кои сакаат да репродуцираат инфериорен звук од 128 kb, Sony нуди функција DSEE Ultimate која наводно може да го подобри квалитетот на звукот користејќи вештачка интелигенција, а има и Vinyl Processor кој ќе додаде грамофонски шмек на музиката за „автентично слушање“.