Рома синоќа ги освои трите бода на гостувањето во Салерно, а Жозе Мурињо задоволен од оствареното нарачал 60 пици за играчите и сите кои се дел од тимот.
„Римската волчица“ со минимални 1:0 ги собра првите 3 бода од новата сезона откако благодарение на голот на Брајан Кристанте во 33. минута ја совлада домашната Салернитана. Рома можеше многу поубедливо да слави, имаше куп шанси и дваесетина удари кон голот на Луиџи Сепе, особено оние на Николо Ѕаниоло и Пауло Дибала кои едноствано среќата не ги посака.
Сепак, и минимална победа носи исто бодови колку и секоја друга, па Мурињо ја оствари целта - стартуваше со победа.
Минатата година Рома гостуваше во Салерно на истиот стадион „Ареки“ на 29 август и победи со 4:0. Тогаш Мурињо на враќање за Рим додека беше во воз објави видео како јаде пица. Толку му се допаднала таа пица од еден ресторан во Салерно, што и овој пат нарачал, но многу повеќе.
Како што пренесува Corriere dello Sport, Мурињо одлучил да ги награди сите инволвирани во гостувањето во Салерно и нарачал 60 пици и пи еден пијалак за вечерата по натпреварот. Освен играчите, јаделе и членовите на тренерскиот тим и сите кои се грижат за екипата, од економ до чистач. Едноставно, сите кои биле во возот за Рим, бидејќи, вечерата била по пат.
Ако некој знае како да направи атмосфера во соблекувалната, тоа е дефинитивно Специјалниот.
