Точно на пладне во швајцарски Нион почна осминафиналната жрепка во Лига Европа, а фортуната не дозволи Арсенал да налета на Јувентус или Рома.
Во првиот барабан беа победниците на осумте групи, кои не играа во плеј-оф фазата каде копјата ги кршеа второпласираните и оние кои дојдоа од Лигата на шампионите. Токму синоќешните победници од плеј-оф дуелите се најдоа во вториот барабан, што доведе до необична ситуација каде гиганти како Манчестер Јунајтед, Рома и Јувентус беа во подредена улога, додека Ференцварош, Фрајбург и Унион Сен-Жилоа беа носители.
Под будното око на генералниот секретар на УЕФА, Џорџо Маркети, топчињата ги влечеше амбасадорот на овогодишното финале, поранешниот унгарски офанзивец Золтан Гера, кој покрај Печ и Ференцварош 10 години настапуваше на Островот играјќи за Вест Вромвич Албион и Фулам.
Фортуната не дозволи битка на титаните од Премиер лигата и Серија А, но донесе неколку интересни пресметки од кои најнеизвесно се очекува да биде помеѓу Манчестер и Спортинг и Рома и Сосиедад.
Осминафинални двојки:
Унион Берлин - Унион Сен-Жилоа
Севиља - Фенербахче
Јувентус - Фрајбург
Баер Леверкузен - Ференцварош
Спортинг - Арсенал
Манчестер Јунајтед - Реал Бетис
Рома - Реал Сосиедад
Шахтар - Фејнорд
Натпреварите ќе се играа на 9 и 16 март, по што ќе следува жрепката за четвртфиналето и полуфиналето. Финалето годинава се игра на 31 мај на „Пушкаш Арена“ во Будимпешта, Унгарија.