Ракометниот клуб Еурофарм Пелистер вечерва соопшти дека за нов тренер на клубот е избран Александар Јовиќ, додека за нов стручен тим-менаџер е назначен Звонко Шундовски.
Од Управата на клубот посочија дека изборот на Јовиќ, досегашен тренер на Еурофарм Пелистер-2, е најдоброто можно решение за постигнувањето на главната цел оваа сезона.
Клубот наскоро ќе го објави составот на стручниот штаб и реогранизацијата на РК Еурофарм Пелистер до крајот на сезоната.
„Управата на РК Еурофарм Пелистер смета дека ова е најдоброто можно решение за постигнувањето на главната цел оваа сезона. Упатуваме голема благодарност до Јовиќ и до Шундовски кои во овие сензитивни и значајни моменти го прифатија големиот предизвик“, посочија од клубот.
Битолчани во петокот спогодбено ја прекинаа соработката со данскиот тренер Ларс Валтер, откако под негово водство тимот бележеше лоши резултати во Европската лига на ЕХФ.
