Вардар среќно против Нексе стигна до Фајнл 4 турнирот каде в петок го чека нов хрватски противник, Загреб и тоа во полуфиналето.
В петок од 20:30 часот во „Крешимир Чосиќ“ салата во Задар, Вардар игра против Загреб во борба за пласман во ново финале од СЕХА лигата каде токму напиот тим е најтрофеен со 5 титули.
Тренерот Стевче Алушовски смета дека Вардар со Нексе помина на среќа, победа на гости и пораз дома, а излезе како победник благодарение на повеќето голови постигнати на гостински терен.
„Направивме добра анализа на сето она што го одработивме заклучно со натпреварот со Нексе. Токму овој дуел е една голема опомена за нас, дека никогаш не треба предвреме да се прогласуваме за победници“, вели Алушовски.
„Добро го анализиравме Загреб, се подготвивме за овој Фајнл 4, па ќе видиме. Вардар од ден на ден се подобрува и затоа очекувам овој Фајнл 4 да биде одлична увертира за новата сезона во Лигата на шампиони“.
Токму првиот противник на Вардар во Лигата на шампионите е еден од можните финалисти во СЕХА лигата, а тоа е белорускиот тим на Мешков кој брка финале против унгарски Веспрем.
„Имаме дури 9 нови играчи кои допрва треба да се вклопат во нашиот систем на игра. Загреб не се прослави на подготовките, но ова е балканско дерби и без разлика на составите, години наназад овие дуели се играат на топка до две“, смета стратегот на „Црвено-црните“.
Финалето е в недела.
