Фудбалерите на Интер со голот на Австриецот во финишот го скршија отпорот на Атлетико.
Интер го победи мадридски Атлетико со минимални 1:0 во првиот натпревар од осминафиналето на Лигата на шампионите одигран на миланскиот „Џузепе Меаца“.
Интер доминираше во поголемиот дел од натпреварот, но Атлетико очекувано одигра цврсто и дефанзивно, и до крајот избраниците на Диего Симеоне одолеваа на нападите на „Нераѕурите“.
Првото полувреме беше многу претпазливо од двете страни, немаше реални шанси, но голем хендикеп за Интер беше повредата на Маркус Турам, кој на полувреме беше заменет со Марко Арнаутовиќ.
Токму австрискиот напаѓач беше централна фигура на натпреварот, кој пропушти неколку одлични шанси и потоа го постигна единствениот гол.
Најпрво во 49. минута доби центаршут од Федерико Димарко, но шутираше само покрај десната статива.
На другата страна возврати Самуел Лино кога остро шутираше покрај голот, а во 63. минута Арнаутовиќ го промаши невозможното.
Австриецот шутна малку над пречката од чиста ситуација од само неколку метри откако капитенот Лаутаро Мартинес му испрати одлично додавање во шеснаесетникот, па резултатот остана 0:0.
Потоа со глава се закани и Лаутаро, но Јан Облак одлично одбрани, за Интер во 79. минута да дојде до заслужено водство.
По грешката на одбраната на Атлетико, Лаутаро тргна во контранапад, но истиот беше сопрен од брилијантниот Облак, а Арнаутовиќ налета на одбиената топка и ја испрати во мрежата за 1:0.
„Нераѕурите“ славеа сосема заслужено и ќе ја бранат предноста во реваншот кој е закажан за 13 март на „Ванда Метрополитано“ во Мадрид.
