Англиската компанија за луксузни спортски автомобили претстави уште еден брзинец, а овој пат се работи за концепт.
Станува збор за концептот DBR22 кој има за цел да ја демонстрира најновата технологија на компанијата Aston Martin и нејзиниот оддел Q by Aston Martin.
Концептот DBR22 е инспириран од тркачкото наследство, поконкретно, им оддава почит на DB3S и DBR1 од 1952 година што Керол Шелби и Рој Салвадори ги возеа за да победат на 24 часа Ле Ман во 1959 година.
Кога работеле на каросеријата, дизајнерите сакале да го минимизираат бројот на панели за да добијат „помускулест“ изглед. Решетката на ладилникот има нов карбонски дизајн со две вертикални летви од двете страни пресечени со хоризонтална летва, а овој дизајн е инспириран од гореспоменатите тркачки автомобили.
Сепак, DBR22 не е фокусиран само на минатото, бидејќи при неговото создавање се користени напредни процеси, технологија и материјали, со што се модернизира „тркачката крвна лоза“ и се создава ново педигре.
Најсовремената технологија го вклучува и начинот на кој брзинскиот возач „управува“ со воздухот околу него, од неговите тенки странични држачи за ретровизори до перфорираниот панел под светлата што овозможува топлиот воздух да избега до задниот дел на автомобилот, кој е комбиниран со дифузор за создавање надолна сила.
Исто така, за прв пат Aston Martin користеше 3D печатач за да ги создаде деловите што ја сочинуваат задната подрамка. Се користеше алуминиум, што овозможи значително намалување на тежината без негативно влијание врз крутоста.
Концептот е придвижуван од 5,2-литарски твин-турбо V12 мотор кој развива 705 КС и 753 Nm вртежен момент, а е поврзан со осумстепен автоматски менувач. Исто така, има систем за обликување на вртежниот момент за оптимизирање на испораката на моќност на патот.
Забрзувањето од 0 до 100 трае помалку од 4 секунди, додека максималната брзина е 319 km/h. Aston Martin тврди дека DBR22 е ѕвер на патеката.
