Националната техничка работна група за COVID-19 вакцинација при Министерството за здравство соопшти дека ги следи сите информации во однос на ефикасноста и безбедноста на сите вакцини, вклучително и на вакцината на AstraZeneca.
-Во тек на вчерашниот ден беа разгледани ставовите на Германија и Канада, чии здравствени регулаторни тела одлучија оваа вакцина привремено да ја користат само кај популација постара од 60, т.е. 55 години, стои во соопштението.
Овие одлуки ги темелат на појава на многу ретки случаи на згрутчување на крвта, вклучувајќи и ретки случаи на тромбоза на церебрален венски синус кај лица кои ја примиле вакцината наAstraZeneca.
Во моментов од страна на ЕМА и СЗО нема промена на официјалните препораки во однос на возрасните групи кои може да ја примаат вакцината на AstraZeneca. Засега најголем број европски држави продолжуваат со вакцинацијата на цела популација со вакцината на AstraZeneca, стои во соопштението.
Имунизација со AstraZeneca во нашата земја почна денеска за граѓаните над 77 години и ќе се одвива според националниот план за вакцинација.
Од Национална техничка работна група за COVID-19 вакцинација посочуваат дека внимателно ќе ја следат состојбата и новите информации во однос на употребата на вакцината на AstraZeneca, а како мерка на претпазливост во следните денови до добивање на официјални препораки и ставови, вакцината на AstraZeneca во нашата држава ќе се употребува само кај популација постара од 60 години.
Бенефитот од вакцинацијата неколкукратно е поголем од ризикот на истата и вакцините остануваат единствен начин за сузбивање на пандемијата. Досега од вакцината на AstraZeneca се дадени над 15 милиони дози и бројот на несакани реакции е изворедно мал, стои во соопштението.
