Раџа Наинголан повторно се враќа во Каљари откако Антонио Конте не смета на неговите услуги.
Откако се повреди Марко Рог, претседателот Томазо Џулини реши да побара замена во играчот на Интер, кој минатата сезона одлично играше во Каљари. Хрватот има повреда на коленото од која не се знае кога ќе се опорави, па Наинголан е совршена замена не само поради неговите способности, туку и поради фактот што тој е навикнат на животот во најголемиот град на островот Сардинија.
И минатата сезона тој играше за Каљари како позајмен од Интер откако Конте оцени дека не му е потребен иако претходната сезона „Нераѕурите“ на Рома ѝ искешираа 38 милиони евра за неговите услуги. Лани за Каљари одигра 26 натпревари во Серија А на кои постигна 6 голови и 5 асистенции.
Оваа сезона за Интер одигра едвај 5 натпревари и тоа сите како замена со вкупна минутажа од 45 минути. Отсуствуваше поради позитивен тест за COVID-19, а потоа и поради мускулна повреда.
Не само поради минатата сезона, Каљари воопшто не е непозната дестинација за Белгиецот бидејќи од 2010 до 2014 настапуваше токму за овој клуб, а одличните игри потоа го одведоа во Рома.
