Во најавата за натпреварот од Лигата на шампиони против Славија италијанскиот тим најде место и за прекрасни зборови упатени кон нашиот Горан Пандев.
Во Милано не го забораваат Пандев и неговиот допринос во освојувањето на долгоочекуваната титула во Лигата на шампионите во 2010 година.
Во онлајн изданието на меч-програмата за денешниот натпревар од 1. коло против чешкиот шампион, Интер одвојува две страници за Пандев.
Најпрво ја пренесува неговата фамозна изјава: „Подготвен сум да направам сѐ за Интер, ако треба и да играм бек“, а потоа додава „Горан Пандев, еден од хероите на Триплета е срамежлив, скромен дечко кој себеси се става во служба на тимот и тренерот“.
„Нема потреба да се трошат зборови за неговиот волшебен удар со левата нога. Слободниот удар на Дербито е еден од најдобрите моменти за кои сонуваме кога ќе ги затвориме очите. „Мојот најдобар другар во Интер? Деки Станковиќ. Кога дојдов тој ми помогна да ја сфатам важноста и привилегијата од носењето на овие бои“. Вистински лидер-змеј кој, токму како и Горан, не се плашеше од никој и ништо. Кога помислуваме на македонскиот фудбалер, не можеме а да не се насмееме. Бидејќи тој беше на теренот во Мадрид, бидејќи „тој ден со Интер мојот најголем сон стана јаве“. И нашиот, Горан. И нашиот стана јаве“.
Онлајн изданието можете да го погледнете со клик тука, а таму има и видео од најдобрите моменти на Пандев во црно-синиот дрес.