Италија и Шпанија се дел од многуте земји ширум Европа кои денеска продолжија со олабавување на рестриктивните мерки воведени за заштита од ширењето на коронавирусот.
Повеќето бизниси во Италија, вклучувајќи кафулиња, барови и фризерници, денеска можеа да отворат по повеќе од два месеца под карантин.
Шпанија, пак, благо ги олабави рестрикциите на некои полесно погодени острови во пандемијата.
Ваквите мерки следат откако беше забележан пад во бројот на регистрирани смртни случаи.
Вчера во Италија беше регистриран најнискиот број на смртни случаи од COVID-19 од почетокот на карантинот во март – 145. Ова претставува значително намалување од највисокиот дневен број на починати од вирусот – 900 – регистриран на 27 март.
Во Шпанија дневниот број на регистрирани смртни случаи падна под 100 за прв пат по воведувањето на рестриктивните мерки. Сепак, здравствените власти предупредуваат дека опуштањето во врска со вирусот може да придонесе за втор бран на инфекции.
Шпанија продолжува со олабавување на рестриктивните мерки според планот во четири фази кој се реализира различно во различни региони, согласно состојбата. На пример, во крајбрежниот град Малага отворија некои барови и ресторани, по речиси два месеца без гости. Таму сепак има силно полициско присуство за да се обезбеди почитување на мерките за заштита.
Мадрид и Барселона, пак, не се ни во прва фаза, од безбедносни причини, и таму уште владеат строги рестриктивни мерки.
Следната табела покажува во кои земји има најмногу починати од COVID-19 (колку е потемна бојата, толку е повисок бројот на нови дневни случаи на заразени)
*Број на смртни случаи на 100.000 жители
Рестораните, баровите, кафулињата, фризерниците и продавниците ширум Италија отворија, под услов да се одржува строга физичка дистанца. Речиси 32.000 луѓе починаа од COVID-19 во Италија, а се очекува намалување на стопанството од 10%. Католичката црква ќе почне со одржување миси за верниците, но само со социјално дистанцирање и носење маски. И другите религиски објекти може да вршат богослужба под истите услови. Здравствените служби сепак предупредуваат дека собирите во големи групи претставуваат епидемиолошки ризик.
Белгија почна со отворање на основните училишта и градинките, под најстроги услови за заштита и безбедност, како и музеите и зоолошките градини, но само со онлајн закажување за да се ограничи бројот на посетители.
Во Грција е отворен славниот Акропол за посетители, а основците се вратија на училиште.
Рестораните, кафулињата и пекарниците во Португалија од денеска може да работат со редуциран капацитет.
Салоните за убавина и фризерниците, како и рестораните и кафулињата низ Полска добија дозвола повторно да отворат, со почитување на социјалната дистанца.
