Можеби и не вреди нагло и ненадејно да се спротивставиме на желбата да се напиеме кафе. Вообичаени симптоми на одвикнување од кофеин вклучуваат мачни главоболки, недостаток на фокус, поспаност и раздразливост.
„Доколку сте навикнати да пиете пијалоци со кофеин, брзото исклучување може да доведе до главоболки, чувство на замор и летаргично или проблеми со концентрацијата“, вели диететичарот од Британската фондација за срце, Викторија Тејлор.
Со кафето, како и сè друго, не треба да се претерува. Освен тоа, студиите покажаа дека неговата умерена конзумација има одредени придобивки за нашето здравје, имено дека го намалува ризикот од развој на срцеви заболувања, срцева слабост, проблеми со срцевиот ритам или прерана смрт. Според упатствата, идеалната количина на кофеин дневно е 200 mg, што е еквивалент на две шолји кафе.
Ако сепак одлучивте да се откажете од кафето, подолу дознајте ги вообичаените симптоми што може да ги доживеете.
Главоболка
Ако некогаш сте се обиделе да поминете еден ден без кофеин, можеби сте доживеале главоболка. Имено, кофеинот ги стеснува крвните садови во мозокот и со текот на времето се навикнувате на него. Но, кога ќе го прескокнете утринското кафе, крвните садови се опуштаат и неочекувано количество крв се пумпа во мозокот, што предизвикува главоболка. Симптомите обично започнуваат 12 до 24 часа по прекинот на внесување кофеин и го достигнуваат својот врв во рок од еден или два дена, но може да траат подолго.
Замор
Не е изненадување што без кафе, ќе бидете уморни и тешко ќе се спротивставите на нагонот да дремнете. Според истражувањата, ефектите од повлекувањето на кофеинот се исклучително силни кај луѓето кои пијат кафе или чај секој ден.
Мрзоволност
Ненадејното прекинување на консумацијата на кафе може да ве направи нерасположени и мрзливи. Познато е дека кафето го подобрува расположението бидејќи кофеинот го зголемува ослободувањето на допамин и норепинефрин. Допаминот влијае на вашето расположение и чувства, а норепинефринот го зголемува отчукувањата на срцето, стапката на дишење и нивото на гликоза во крвта. Како резултат на тоа, ако престанете да пиете кафе, овие хемиски сигнали се испраќаат побавно, па може да забележите пад на расположението и нивото на енергија што нè прави да се чувствуваме нервозни.
Недостаток на фокус
Ако наеднаш престанете да пиете кафе, ќе забележите разлика во концентрацијата. Една американска студија објавена во списанието Consciousness and Cognition во 2020 година сугерира дека кофеинот може да ги подобри вашите способности за решавање проблеми.
Тоа е затоа што кофеинот влијае на хемикалиите во мозокот, вклучувајќи го и глутаматот, кој е од витално значење за учењето и меморијата. Штом кофеинот ќе исчезне, вашите хормони ќе почнат да се усогласуваат, а хемикалиите кои ви помагаат да се фокусирате ќе почнат да се испраќаат побавно, создавајќи мозочна магла.
Гадење
Кафето може да предизвика мускулни контракции во дигестивниот систем, што се покажало како ефикасно во ублажување на запек. Од друга страна, кога ќе престанете да го пиете, тоа може да влијае на тоа колку често одите во тоалет. Исто така, кога ќе го исфрлите кофеинот од вашата исхрана, може да почувствувате непријатно чувство на гадење.
Тремор
Чувството на нервоза и тремор може да се појави од пиење премногу кафе бидејќи кофеинот е стимуланс на централниот нервен систем. Експертите велат дека, иако се јавува поретко, обично поминува во рок од неколку дена.
