Шпанскиот весник As тврди дека Реал Мадрид продолжува да ги оценува опциите што ги има за да ја засили позицијата „деветка“.
Кралскиот клуб има две опции. Првата е да се купи реномиран напаѓач, кој сигурно ќе чини над 100 милиони евра, а второто е да се одлучи за некој поевтин, или млад напаѓач или некој при крај на кариерата, кој би послужил како решение до летото следната година кога Ерлинг Холанд и Килјан Мбапе би станале пореални опции.
Списокот на потенцијални решенија за реномираниот напаѓач се сведе на три имиња и тоа Душан Влаховиќ, Гонсало Рамос и Хари Кејн. Според Марко Руиз од As, фаворит во Реал е Кејн, за кого Тотенхем бара 115 милиони евра и е поотворен за идејата да го продаде на странски клуб отколку на некој од нивните лигашки ривали.
Кејн би преферирал да остане на Островот, што може да биде проблем за плановите на Реал. Неговата голема желба е да го собори рекордот на Алан Ширер по број на голови во Премиер лигата. Нему му недостасуваат 49 гола од 260-те на Ширер, на кои му требаат уште најмалку две сезони.
Сепак, скаутинг службата на Реал многу го цени и Шпанците би можеле да дадат сè од себе за да го доведат во Мадрид. На 30-годишна возраст, Кејн опсесивно се грижи за своето здравје и исхрана и треба уште долго да игра на највисоко ниво.
Доколку потпише за Реал, тоа би значело дека Холанд најверојатно нема да му биде на патот следното лето, што не е случај со Мбапе, кој потоа ќе биде слободен и ќе може да игра на крилните позиции.
