Австралискиот тенисер Ник Кирјос призна дека ја нападнал својата поранешна девојка, но избегна кривична пресуда.
Кирјос (27) се изјасни за виновен пред судот во Канбера, откако неговите адвокати не успеаја да го отфрлат обвинението врз основа на нарушено ментално здравје.
Кирјос ја турнал тогашната девојка Кјара Пасари на тротоар за време на расправија во Канбера во 2021 година. Судијката овој инцидент го нарече „чин на глупост или фрустрација“ и го поштеди тенисерот од криминално досие.
Тенисерот ја турнал девојката откако таа се обидела да го спречи да се оддалечи со автомобил на 10 јануари 2021 година. Пасари го пријавила инцидентот во полиција следниот месец, но не поднела официјална пријава. Кирјос и Пасари се помирија и ја продолжија врската, но повторно раскинаа, па Пасари поднесе официјална жалба во декември 2021 година.
Адвокатот Мајкл Кукулис-Смит рече дека Кирјос се обидел да избегне инцидент така што викнал Uber и се обидел „на дозволен начин да ја отстрани“ Пасари од автомобилот.
„Мојот клиент од фрустрација реагираше и се случи прекршок. Има поврзаност помеѓу менталното здравје и обвинетиот, но денес тој не страда од тие проблеми во иста мера“, рече адвокатот.
Кирјос се извини следниот ден и ја прифати одговорноста.
Судијката Бет Кембел рече дека Кирјос бил „млад човек кој се обидувал да се извлече од емотивна ситуација и дејствувал во моментот“.
„Јас се однесувам кон Вас исто како што би се однесувала кон секој млад човек во овој суд. Вие сте млад човек кој добро го удира тениското топче“, додала судијката.
