Повредениот капитен на Тампа Беј Лајтнинг е сѐ поблиску до враќање на мразот иако нема да биде дел на вечерашниот втор натпревар од финалната серија.
Стивен Стамкос, еден од најдобрите канадски хокеари на денешницата, кој по татко е Македонец, полека закрепнува од незгодната повреда на ногата која го тргна од мразот токму во завршницата на сезоната.
Тој нема одиграно натпревар од 25 февруари кога заработи повреда на мускулот па на 2 март мораше да се оперира. Следуваше пауза поради пандемијата, а Стамкос на двапати се враќаше и одново се повредуваше.
Ското цел плеј-оф Стамкос лизга со екипата, но тренира одделно. Очекувањата се дека ќе се врати на мразот во некој од натпреварите од Стенли Куп финалето. Вечерва по полноќ Тампа го игра вториот дуел против Далас Старс, но Стамкос и вечерва ќе ги гледа неговите соиграчи од зад заштитана ограда.
„Мора да бидеме сигурни дека играчот е добро кондициски подготвен. Нема шанси да ризикувам, не во овој дел од сезоната“, рече тренерот на Тампа, Џон Купер, иако се работи за најдобриот играч на екипата.
Тампа Беј Лајтнинг има негатива од 0-1 по првиот натпревар кој ноќта помеѓу сабота и недела го загуби со 4:1 од Далас. Стамкос целата кариера е во Тампа и никогаш не бил поблиску до триумф во НХЛ.
Стамкос е роден во Канада, но по татко е Македонец, додека мајка му е Шкотланѓанка. Татко му Крис е дете на бегалци од селото Арменско, Грција. Како што вели, омилена храна му е „зелник од Баба“.
