Роберто Манчини повторно се наврати на елиминацијата на Италија од Македонија и второто по ред пропуштено Светско првенство.
Исто како и во 2018 година во Русија, „Аѕурите“ и сега се приморани да го гледаат најголемиот фудбалски турнир од дома. Болна реалност за италијанските навивачи по разочарувачкиот пораз од Македонија во мартовскиот бараж. Манчини одлучи да не си поднесе оставка по таа катастрофа најавувајќи препородување на Италија за ЕУРО 2024.
Зборувајќи на прес-конференција пред вечерашниот пријателски натпревар со Албанија, Манчини повторно изјави дека Италија заслужила да игра на Мундијалот.
„Ова ќе биде тежок месец... само што започна. Среде горчината што ја чувствуваме во моментов, мораме да играме натпревари, има работи кои треба да се видат и евалуираат“, почна тој.
„Од март имам емоционални потешкотии. Заслуживме да бидеме на Мундијалот, но за жал си ја прокоцкавме шансата. Фудбалот е таков - после огромна радост дојде огромно разочарување и не можеме да направиме ништо околу тоа. Светско првенство без Италија е поинакво. Мора да работиме на вистинскиот начин за да бидеме сигурни дека ова нема да ни се повтори“, додаде.
Италија минатото лето го освои ЕУРО 2020 по што потфрли во квалификациите, прво неуспевајќи да го задржи првото место за директен пласман, кое го грабна Швајцарија, а потоа беше елиминирана од Македонија во баражот со гол во последните моменти.
