Иако водеше против Јужна Кореја, Саудиска Арабија прими гол за израмнување длабоко во судиското надополнување, а потоа загуби на пенали.
Ништо од враќањето на азискиот пехар во Саудиска Арабија по пауза од 28 години. Ниту Роберто Манчини не успеа да направи успех со оваа репрезентација, дури и разочара бидејќи Саудијците се пакуваат за дома со елиминација уште во осминафиналето.
Икао групата ја минаа без пораз, со победи над Оман (2:1) и Киргистан (2:0) и едно без голови против Тајланд, избраниците на Манчини потфрлија во првиот нокаут предизвик.
Денеска ги вкрстија копјата со Јужна Кореја, која во групната фаза не одигра добро. Откако првите 45 минути завршија без голови, веднаш штом почна вториот дел Саудијците поведоа преку Абдула Радиф.
Се држеа, регуларните 90 минути истекоа, и кога сите помислија дека Манчини и неговата репрезентација ќе одат понатаму во 9-тата минута од надополнувањето Чо Гуе-сан погоди за израмнување и го одведе натпреварот во продолженија.
Таму немаше голови, па победникот мораше да се одлучи по изведување на пенали. Серијата од 5 пенали не го дочека крајот, беа изведени само по 4 откако Сами Ал-Наџеи и Абдулраман Гариб промашија за Саудиска Арабија, додека сите четворица Корејци беа сигурни.
Дефинитивно во Саудиска Арабија ќе бидат многу разочарани од неуспехот на Манчини, особено што уште пред турнирот му се замеруваше за изоставувањето на тројца играчи кои беа дел од репрезентацијата на Мундијалот 2022.
Инаку, за пласман во полуфиналето на Азискиот куп 2023 во Катар ќе се борат:
Таџикистан - Јордан
Австралија - Јужна Кореја
Катар - Узбекистан
додека последната двојка ќе биде позната утре кога ќе играат Бахреин - Јапонија и Иран - Сирија.
Финалето е на 10 февруари.
