Поранешниот руски претседател Дмитриј Медведев денеска го обвини јапонскиот премиер Фуми Кишида за послушност кон САД и предложи тој да изврши ритуално самоубиство.
Јапонскиот премиер го посети Вашингтон за да го зајакне сојузот меѓу Јапонија и САД наспроти растечките предизвици од Кина и предупреди дека Русија не треба да користи нуклеарно оружје во Украина.
„Силно се спротивставуваме на какви било еднострани обиди за промена на статус квото со сила или принуда, каде било во светот“, се вели во заедничката изјава.
„Ова е толку монструозен срам што нема ни да коментирам за паранојата за нуклеарните планови на нашата земја. Размислете за тоа. Шефот на јапонската влада во понижувачки, лојален занес тропа глупости за Русија. Тој го предаде споменот на стотиците на илјадници Јапонци кои загинаа во нуклеарниот напад на Хирошима и Нагасаки“, напиша Медведев на Telegram.
Тој исто така рече дека Кишида е „само слуга“ на Американците и дека „слугите не можат да бидат храбри“.
„Можеме само да ги жалиме Јапонците. На крајот на краиштата, таквиот срам може да се измие само со извршување сепуку веднаш на следната седница на нивната влада. Иако концептот на чест кај оваа генерација јапонски вазали не е вообичаен“, напиша Медведев.
Сепуку е ритуално самоубиство на припадниците на класата на јапонски воини и великани, кај нас попознати како харакири.