Многу грди слики и коментари го следеа натпреварот помеѓу Холандија и Аргентина во четвртфиналето на Светското првенство. Еден од оние кои се најде во центарот на вниманието, поради повеќе причини е голманот Емилиано Мартинес. Но, со него и со Лео Меси, кој не се однесуваше како што сме навикнати од него.
Мартинес одбрани два пенала, но два дена по натпреварот тој е во центарот на вниманието поради неговите изјави и однесување што доведе до тоа Дисциплинската комисија на ФИФА да отвори постапка против него.
По изведувањето на пеналите Мартинес дојде до клупата на Холандија и му дофрли на тренерот на „Лалињата“, Луи ван Гал:
„Те по*бав двапати, педеру“, му се нафрли Мартинес на Ван Гал додека тренерот на голманите на Аргентина се обидуваше да го смири.
По натпреварот тој се обиде да ја објасни својата реакција:
„Слушнав дека Ван Гал пред натпреварот рекол дека Холандија има предност и дека ќе победи доколку има пенали. Мислам дека требаше да ја држи устата затворена“.
Мартинес алудира на тоа дека Ван Гал го сметал својот два метра висок голман Ноперт за далеку подобар од Аргентинецот.
Откако судијата Лахос, кој покажа дури 18 жолти картони на овој натпревар, што само по себе е рекорд на Светските првенства, пријави што се случило, но и поради изјавите кои биле упатени кон самиот судија, ФИФА покрена истрага.
„Дисциплинската комисија на ФИФА отвори постапка против Аргентинската фудбалска асоцијација за можни прекршувања на членот 12 (недолично однесување на играчите и официјалните лица) и членот 16 (нарушување на редот и безбедноста на натпреварите) од Дисциплинскиот законик“, се вели во соопштението на ФИФА.
Сепак, Аргентинците не се плашат само од потенцијалната суспензија на Мартинес пред дуелот со Хрватска.
Во непријатна ситуација со изјавите по натпреварот се стави и Лионел Меси, кој го коментираше судењето и рече дека Холандија израмнила по непостоечки фаул, а додаде и низа други критики кон судијата Лахос, чие судење го оцени како „општо лошо“.
Инаку, постапка по истиот основ е покрената и против Кралската фудбалска федерација на Холандија чии играчи при пенал-рулетот константно ги провоцираа Аргентинците, кои потоа за одмазда в лице им славеа на Холанѓаните.
Аргентина во вторник од 20 часот во полуфиналето ќе игра против Хрватска.
