Со синоќешниот убедлив пораз во Париз тимот од Милано постави неславен рекорд помеѓу клубовите од Чизмата со тоа што во првите три кола од Лигата на шампионите не постигна ниту еден гол.
Откако сезоната во фазата по групи ја отвори со реми без голови дома против Њукасл, натпревар кој „Росонерите“ сѐ уште жалат што не го добија бидејќи ги надиграа Англичаните и се изнапромашија, потоа отпатуваа во Дортмунд на мегдан со Борусија од каде се вратија со истиот резултат - 0:0.
Синоќа гостуваа на „Паркот на принцовите“ кај Пари Сен-Жермен и се вратија со три гола во својата мрежа, но и без постигнат гол, што е причината за поставувањето на овој неславен рекорд.
Имено, од сите италијански екипи што некогаш играле во фазата по групи од Лигата на шампионите, ниту една немала толку лош напад за во воведните три кола да не успее да постигне барем еден единствен гол. Тоа го направи Милан.
Ако ја гледаме серијата која трае уште од минатата сезона, Милан во Лигата на шампионите нема постигнато гол на вкупно 5 натпревари по ред, со оглед на тоа што двата полуфинални натпревари лани против градскиот ривал Интер ги заврши без да постигне гол.
Така, Милан е и првиот италиајнски тим што во европската елита не постигнал гол 5 натпревари. Сѐ на сѐ, Милан нема гол 497 минути откако последен пат мрежата ја затресе Оливје Жиру лани во 43. минута против Наполи во четвртфиналето.
Милан сезонава има 2 бода од три кола и се наоѓа на последното место на табелата на која ПСЖ води со 6, а Бортусија и Њукасл имаат по 4 бодови. Со три кола до крајот Милан сѐ уште има добри шанси да избори пласман во нокаут фазата, но за тоа ќе мора да почне да постигнува голови затоа што само така се победува.
Покрај „Росонерите“, сезонава на гол се немаат израдувано уште и играчите на португалскиот шампион Бенфика.
