Хрватскиот креативец смета дека одличниот играч на ПСЖ перфектно би се вклопил на „Сантјаго Бернабеу“ доколку на лето направи трансфер.
Лука Модриќ фрли масло на распалениот оган кој гори сѐ посилно и посилно кога се во прашање шпекулациите за наводниот трансфер на Килјан Мбапе во Реал Мадрид.
„Слушаме најразлични приказни околу тоа кои играчи би дошле и кои би си заминале“, вели Модриќ зборувајќи со новинари од својата татковина околу летниот трансфер пазар на неговиот клуб.
„Мбапе е голем играч и тоа го докажа со националниот тим и со ПСЖ. Големите играчи секогаш се добредојдени во Реал Мадрид, но сепак не е во ред од моја страна да зборувам за играчи кои се во други клубови, особено не во овој дел од сезоната“, рече Модриќ сепак кажувајќи го најважното.
Мбапе има договор со ПСЖ до јуни 2022 година, така да летово е вистинска шанса за ПСЖ да заработи од негов трансфер во случај играчот да не сака да го продолжи договорот. Летото 2018 „Светците“ на Монако му искешираа 145 милиони евра за неговите услуги, неговата моментална вредност е 160 милиони евра, а веројатно Реал би требал да плати околу 200 милиони евра за евентулаен трансфер.
„Ќе мора да почекаме и да видиме што ќе се случи нарената сезона, но, во секој случај, тој е одличен играч и е еден од најдобрите во светот“, завршува Хрватот.
Младиот Французин растура сезонава во дресот на ПСЖ постигнувајќи 33 голови на 40 натпревари во сите натпреварувања, плус 10 асистенции.
