Играчот на Бафало Билс, Дамар Хамлин, се наоѓа во критична состојба откако колабираше на теренот за време на првата четвртина од натпреварот против Синсинати Бенгалс ноќеска, објави официјалната веб-страница на НФЛ.
Играчот се сруши на земја и паднал на грб само неколку моменти по обидот да го запре противничкиот играч Ти Хигинс, по што следуваше вистинска драма, а како што пренесуваат американските медиуми, за само 10 секунди му била укажана итна медицинска помош.
Набрзо на терен пристигнала и Брза помош, а се известува дека биле принудени да извршат реанимација. Во тој момент камерите ги снимија реакциите на многу играчи на теренот кои беа во солзи.
„Веднаш му беше укажана помош и беше пренесен во локалната болница каде беше примен во критична состојба“, се вели во соопштението на НФЛ.
По колабирањето на Хамлин натпреварот беше прекинат при водство на Синсинати од 7:3 и одложен за друг датум. На социјалните мрежи Хамлин доби голем број пораки за поддршка, како од играчите и луѓето од овој спорт воопшто, така и од други.
Бафало Билс е моментално на второто место во Америакнската конференција со скор 12-3, додека Синсинати е веднаш зад него со 11-4. Лидер во оваа конференција е Канзас Сити Чифс.