Најдобриот играч според многумина во историјата на американскиот фудбал, Том Брејди, официјално објави дека заминува во спортска пензија.
Најавата дека 44-годишниот квотербек на Тампа Беј Баканирс донел одлука да се збогува со спортот во кој владееше изминатите две децении и освои 7 шампионски титули дојде минатата недела од американката телевизија ESPN.
Иако во меѓувреме имаше и спротивни информации, потврдата за своето пензионирање Брејди ја објави вечерва преку социјалните мрежи.
„Тешко ми е ова да го напишам, но дојде моментот. Веќе нема да играм, објави Брејди, кој освои 6 шампионски титули со Њу Ингланд Петриотс (2001, 2003, 2004, 2014, 2016 и 2018) и една со Тампа Беј Баканирс, минатата сезона.
„Ја сакам својата НФЛ кариера, но време е да се фокусирам на некои други работи, и времето и енергијата да ги насочам кон други сфери“, додаде Брејди.
