Канадските клубови ќе се натпреварувата во сопствена дивизија во новата сезона која ќе почне на 13 јануари.
Бидејќи минатата сезона траеше многу подолго со оглед на прекинот (заврши дури на 28 септември), новата ќе почне дури на 13 јануари иако ќе го зачува името како сезона 2020/21.
Со оглед на настаните, раководството на НХЛ мораше да ги промени и пропозициите, не само календарот. Така, дојде до прераспределба на клубовите по дивизии кои ќе бидат четири и тоа Исток, Запад, Север и Центар. Секој тим ќе одигра 56 натпревари, а во регуларниот дел ќе се натпреварува само против тимови од својата дивизија. Освен Север каде има по 7 тимови, сите останати дивизии содржат по 8.
Најдобрите четири од секоја дивизија ќе се пласираат во нокаут-фазата каде ќе се игра по стариот систем, односно подобар од седум партии, сѐ до Стенли Куп финалето. Во првите две нокаут-рунди меѓусебе ќе играат клубови од иста дивизија, односно првиот против четвртиот и вториот против третиот, а потоа победниците ќе играат помеѓу себе за шампион на дивизијата и така ќе се добијат четирите полуфиналисти.
Новата поделба е резултат на рестрикциите кои канадската Влада ги воведе за патување во САД. Затоа, дивизијата Север ја сочинуваат исклучиво канадски тимови во нешто што всушност наликува на канадска лига. Токму поради тоа Канаѓаните се дополнително возбудени.
„Ќе имаме така малку повеќе гордост играјќи во канадска дивизија. Сигурен сум дека секој ќе биде повеќе мотивиран“, вели Брендан Галагер, напаѓач на Монтреал Канејдиенс.
„Мислам дека ќе биде неверојатно. Ќе биде многу поескпонирано поради канадските медиуми, сите оние веб-страници, зборувањето ќе биде за канадските тимови. И за самите канадски тимови ќе биде одлично поради тоа што ќе наликува малку на олд-скул“, смета тренерот на Винипег Џетс, Пол Морис.
„Ќе биде многу поинтересна сезона за навивачите. Тоа што повеќе пати ќе играме едни против други ќе нѐ направи и поголеми и полути ривали“, рече Марк Џордано, капитенот на Калгари Флејмс.
