Вечерва се игра финалето на Клупското светско првенство во кое се среќаат Баерн и Тигрес.
Европскиот шампион против шампионот на Северна Америка, мексиканскиот клуб Тигрес. За прв пат во финале ќе се сретнат еден против друг клубови од овие два континента откако Тигрес во полуфиналето го елиминираше шампионот на Копа Либертадорес, Палмејрас.
Германците важат за големи фаворити, но Тигрес не е наивен противник, а главна закана за Баерн се очекува да биде францускиот голгетер Андре-Пјер Жињак. Тоа го признава голманот и капитен Мануел Нојер.
„Во Жињак имаат врвен стрелец кој има неверојатно чувство за гол кога е во шестнаесетникот. Тој е искусен, брзо се приспособува на натпреварот и на фудбалот кој го играме ние во Европа“, вели баварскиот капитен.
На Мундијалот Жињак досега постигна 3 гола и води на листата на стрелци пред Роберт Левандовски кој има 2 гола.
„Тигрес игра со висок пресинг, потоа на средината имаат играчи кои знаат да дадат гол и поради тоа ќе мора да внимаваме уште од почетокот. Мора цело време да се движиме“, дидава Нојер.
Натпреварот почнува од 19 часот на „Еџукејшн Сити“ стадионот во градот Ал Рајан во Катар, а ќе го суди уругвајскиот судија Естебан Остохич. Директен пренос ќе врши МРТ3.
