Воените власти пронајдоа остатоци од воен авион F-35 кој исчезна откако пилотот се катапултираше над Јужна Каролина. Според информациите, пилотот бил примен во болница, но е стабилен.
Остатоците од авионот вреден 100 милиони долари што исчезна во неделата попладне беа откриени во руралниот округ Вилијамсбург, соопштија властите.
Пилотот се катапултирал од пилотската кабина и паднал со падобран на безбедно во населбата Северен Чарлстон. Дури и од јавноста се бараше да помогне во пронаоѓањето на авионот.
Во соопштението од понеделникот, воените претставници рекоа дека остатоците биле пронајдени „два часа североисточно од заедничката база Чарлстон“.
Официјалните лица ја фокусираа својата потрага околу езерата Мултри и Мерион, северно од градот Чарлстон, последната позната локација на авионот.
„Остатоците од исчезнатиот авион се пронајдени“, изјави воен портпарол за BBC.
„Несреќата моментално е под истрага и не можеме да дадеме дополнителни детали за да го зачуваме интегритетот на истражниот процес“, изјавија маринците во понеделникот по завршувањето на потрагата.
Од јавноста е побарано да се држи подалеку од областа за иследниците да можат да ја завршат својата работа.
„Борбениот авион бил оставен во режим на автопилот кога пилотот се катапултирал“, изјави портпаролот на заедничката база Чарлстон за NBC News, додавајќи дека можеби бил во воздух некое време, што го искомплицирало неговото пронаоѓање.