Хабиб Нурмагомедов и дечките кои менаџираат со Instagram профилот на каталонскиот гигант Барселона разменија неколку интересни коментари на социјалната мрежа.
Имено, УФЦ шампионот објави слика од Барселона каде на „Камп Ноу“ ги гледаше домаќините против ПСЖ. Хабиб има одлични односи со управата на парискиот клуб, па го поканија да присуствува на натпреварот како специјален гостин.
Во објавата тој вели дека ќе навива за ПСЖ затоа што е голем фан на Реал Мадрид. Официјалниот профил на Барса на Instagram се јави во коментарите и оттаму му порачаа дека не е доцна да се премисли кого ќе го поддржува.
„Навивам за Реал Мадрид од 1998 година, но никој не може да ја оспори големината на Барселона. Среќно во овие тешки моменти!", мудро им одговори Хабиб.
Додека некои веруваат дека Хабиб навистина ѝ посака среќа на Барселона, многумина сметаат дека тој всушност ја искористи шансата да го истрола каталонскиот клуб, каде веројатно не им беше баш по ќеиф да им се каже дека се во тешки времиња.
За потсетување, Барселона загуби од ПСЖ со 1:4, а Нурмагомедов секако беше задоволен.
