Белгискиот напаѓач Ромелу Лукаку по само една сезона во дресот на Челси ќе се врати во Интер и тоа на едногодишна позајмица вредна 8 милиони евра.
Според медиумите во Англија и Италија, договорот меѓу Челси и Интер е да нема откупни опции или задолжителни клаузули во договорот за позајмица, а Лукаку да има плата од 8 милиони евра.
Лукаку се врати во Челси пред една година откако лондонскиот клуб му плати на Интер 113 милиони евра за неговите услуги, но од самиот почеток беше јасно дека не е среќен на Островот и дека го напушти Интер во период кога беше во најдобра форма.
Со текот на времето го загуби местото во првиот тим, дури и се скара со тренерот Томас Тухел околу минутажата, а потоа изјави дека неговото срце е во Италија и Интер и дека по секоја цена сака да се врати на Апенините.
Минатата сезона одигра вкупно 44 натпревари во сите натпреварувања, на кои постигна 15 гола и забележа 2 асистенции. Претходната сезона, кога го носеше дресот на Интер, одигра вкупно 44 натпревари и постигна 30 гола со 10 асистенции. Иако одигра ист број на натпревари, минутажата која ја имаше е многу различна: 2.748 минути за Челси, а 3.565 за Интер. Покрај тоа, со Интер стана и шампион на Италија.
Лукаку има важечки договор со Челси до 30 јуни 2026 година, а доаѓањето во Интер речиси сигурно ќе значи и заминување на Един Џеко, за што претходно пренесоа медиумите во Италија. Со оглед на тоа што Лаутаро Мартинес ќе остане во Интер, а на чекор под потпис е и Пауло Дибала, јасно е дека вишокот тука е Босанецот, кој е и највозрасен од сите нив.
