Конечно на јавноста ѝ се обрати оној кој сите го чекаа да каже нешто - Кристијано Роналдо - еден од најдобрите фудбалери во историјата на фудбалот чиј сон за Божицата на победата на ФИФА и петти пат заврши без успех.
Португалецот откако низ солзи завчера го напушти теренот по изненадувачката победа на Мароко над неговата Португалија зборуваше за мундијалскиот сон кој не успеа да го оствари. Но, не најави повлекување од репрезентацијата, барем не сега.
„Освојувањето на Мундијалот за Португалија беше најголемиот и најамбициозниот сон во мојата кариерата. За среќа, освоив многу меѓународни трофеи, вклучително и со Португалија, но да го доведам името на нашата земја на највисокото светско ниво беше мојот најголем сон“.
„Се борев за тоа. Упорно се борев за тој сон. За 16 години учествував на 5 Мундијали, играв покрај одлични фудбалери и со поддршка од милиони Португалци, дадов сѐ од себе. Дадов сѐ на теренот. Никогаш не го свртев лицето од борбата и никогаш не се откажав од тој сон“.
„За жал, синоќа сонот заврши. Не вреди да се реагира жестоко. Сакам сите да знаат дека многу е кажано, многу е напишано, многу се шпекулира, но мојата верност кон Португалија не се промени ниту за момент. Отсекогаш сум бил еден од оние кои се бореле за заеднички цели и никогаш не би им свртел грб на соиграчите и на мојата земја“.
„Засега немам што повеќе да кажам. Благодарам, Португалија. Благодарам, Катар. Сонот беше прекрасен додека траеше… Сега останува да почекаме додека времето не стане добар советник и ќе му дозволи на секој да донесе свои заклучоци“.