Додека 30 кандидатки за мис на Тајланд позираа на мост во тајландскиот град Чианг Мај, се случи прилично драматичен момент кој камерите успеаја да го доловат.
Во текот на промотивните активности, натпреварувачките посетија ресторан и насмеани позираа на мост приврзан со јажиња за металното шеталиште. Меѓутоа, градбата се урна од нивната тежина и сите 30 девојки паднаа во валканата вода на езерото.
Три девојки се повредени, една се здоби со исекотини и модринки на челото, додека две имаат гребаници. Веднаш се превезени во болница и наскоро ќе бидат пуштени.
Сопственикот на ресторанот вели дека е посрамотен од инцидентот и вети дека ќе плати околу 16.500 долари за болничките услуги, како и хемиско чистење на облеката на девојките.
Засега, само 27 девојки ќе продолжат да се натпреваруваат за титулата најубава девојка во Тајланд, а останатите три ќе им се придружат откако ќе излезат од болница.
