Евгениј Пригожин, основач на приватната воена компанија Вагнер, вчера објави дека неговата платеничка група почнала да прима муниција.
„Според прелиминарните податоци, почнуваме да добиваме муниција“, рече тој вчера во аудиопораката што ја објавија неговите портпароли. Тој додаде дека во Бахмут се водат „жестоки“ борби, но тврди дека неговите сили напредуваат, пишува Kyiv Post.
Сепак, Пригожин рано утрово објави нова снимка.
„За да не се расипе ничиј одмор, целосното видео кое ви кажува за состојбата со муницијата ќе биде прикажано точно во 10:40, по завршувањето на победничката парада. А бидејќи е 3:30 часот наутро, имаме уште време - кој знае , можеби ќе ја добиеме муницијата. Тогаш нема да ја покажеме“, рече тој.
На крајот го објави видеото со кое се заканува. Во него тој обвини руска воена единица дека бега од нејзините позиции во близина на Бахмут во источна Украина, каде во моментов се водат најжестоките борби.
„Денеска единица на Министерството за одбрана побегна од едно од нашите крила... оставајќи разоткриен фронт“, рече Пригожин.
Тој го повтори своето ветување дека неговите борци ќе го напуштат Бахмут доколку руската војска не достави повеќе муниција. Дополнително, тој ја доведе во прашање способноста на Кремљ да ја брани земјата додека Украина се подготвува за пролетна офанзива.
„Зошто државата не е во состојба да ја одбрани својата земја?“, прашува тој, додавајќи дека Украина „успешно“ ги погодува пограничните региони на Русија.
„Денот на победата е победа на нашите предци, ние не заслуживме ниту мал дел од таа победа“, тврди Пригожин. „Постои злосторство наречено ‘уништување на рускиот народ’... И тоа го прави мала група“.
„Нема да заминеме (од Бахмут), ќе останеме уште неколку дена, ќе се бориме и покрај сè, ќе се снајдеме“, рече тој.
Тој ја обвини воената хиерархија дека сака да го „измами“ Путин.
„Ако се направи сè за да се измами врховниот командант (Владимир Путин), тогаш или ќе ви ја отсече главата... или рускиот народ ќе биде бесен ако војната биде изгубена“, заклучи тој.
