Opel Rocks-e се појави во август 2021 година како верзија со германска ознака на Ami на Citroën, што всушност е мало градско електрично возило. Неполна година подоцна, Opel претстави карго верзија на истиот модел, а сега Rocks-e доби уште еден член. Сепак, овој пат не е стандардно сериско возило.
Станува збор за уникатен прототип кој нема да влезе во производство, а овој „див“ концепт е идеја на студентот Лукас Венцхофер, кој е победник на натпреварот наречен #OpelDesignHack. Германската компанија вети дека ќе произведе победнички концепт и на крајот го исполни ветувањето, така што радикалниот електричен кабриолет стана реалност.
Венцхофер замислил Rocks-е да биде возило за сите терени со WOW фактор. Во споредба со стандардниот квадрицикл, концептот се одликува со пошироки лакови на тркалата, тубуларна рамка околу кабината и гуми со висок стисок. Суспензијата е изменета за да се приспособат нови тркала, а возилото е подигнато повисоко од земјата. Веројатно најинтересниот детаљ е задното крило, кое е изведено од моделот Vectra GTS V8, тркачки автомобил DTM со 4,0-литарски V8 мотор.
Но, тоа не е сѐ. Предната табла сега има нова интерпретација на Opel Visor со различни LED светла и логото на Opel во тиркизна боја. Целиот преден панел и браниците се произведени со помош на 3D печатач. На рамката на покривот се монтирани и LED светла, а назад се нови задни LED светла.
„Оф-роуд можностите промовираат чувство на слобода за да се стигне до која било дестинација. Повеќе спортивност ветува поголема забава при возењето и покажува дека електромобилноста е повеќе од разумно решение“, рече Венцхофер.
Нема детали за механичките подобрувања, па батеријата од 6,6 kWh обезбедува автономија од 75 километри со едно полнење и го напојува електромоторот со 8 КС.
Stellantis, компанијата која е сопственик на Opel, го продава истиот производ со логоа на Citroën и Fiat.
