Саудискиот весник Al-Sharq Al Awsat објави дека португалскиот тренер Жозе Мурињо постигнал договор да го преземе кормилото на саудиски Ал Шабаб.
Три дена по заминувањето од клупата на Рома, Жозе Мурињо е подготвен да се врати на терените. Така барем тврди саудискиот весник Al-Sharq Al Awsat, кој наведува дека португалскиот тренер постигнал усмен договор да го преземе тимот кој моментално се наоѓа на 11. место во саудиската лига.
Договорот, наводно, бил постигнат по состанокот на Zoom помеѓу Мурињо и Доменико Тите, спортскиот директор на Ал Шабаб, за време на кој Специјалниот го покажал своето знаење за „саудискиот спортски проект“ и ветил дека ќе претстави „широк план“ за успехот на Ал Шабаб.
Ал Шабаб нема освоено титула во Про лигата веќе 12 години, а нивниот последен трофеј дојде пред една деценија во Купот на кралот на Саудиска Арабија.
Меѓу играчите кои веќе се во клубот се Јаник Караско, Евер Банега и Роман Саис, а доколку соработката и официјално биде потврдена, тоа ќе биде прво назначување на Мурињо надвор од Европа.