Властите во сојузната американска држава Невада дадоа дозвола за организирање на ММА борби, што значи дека УФЦ се враќа во Лас Вегас.
Поради пандемијата со COVID-19 што донесе низа рестриктивни мерки низ САД, раководството на УФЦ организираше три борби во Џексонвил, Флорида, но сега се враќа на „свој терен“.
На 31 мај, во сабота, се очекува првиот настан во Лас Вегас, а главната борба на УФЦ 250 ќе биде меѓу поранешниот првак во велтер категорија Тајрон Вудли и Гилберт Бернс.
Вудли, кој четири пати го одбрани појасот пред да биде победен на бодови од Камару Усман лани, со евентуална победа повторно би се вратил во игра за титулата најдобар ММА борач до 77 килограми на светско ниво.
Одржувањето борби во Невада беше забрането од 14 март, а сега продолжуваат, но без публика.
Покрај УФЦ борби, од 9 јуни во Лас Вегас ќе може да се одржуваат и бокс мечеви.
