Украинската фудбалска федерација на 24 март треба да ѝ гостува на Шкотска, но поради војната во Украина одигрувањето на натпреварот е неизвесен.
Украина дојде многу блиску до својот втор мундијалски настап. Ја делат два бараж натпревари до пласман во Катар 2022, втор пат во историјата на земјата по дебито во Германија 2006 кога репрезентацијата беше предводена од легендарниот Андриј Шевченко.
Но, руската воена интервенција која направи хаос во земјата ја стави во безизлезна ситуацијата. Илјадници лиѓе ги напуштаа градовите, фудбалското првенство е во прекин, а никому и не му е до фудбал.
Проблем е што добар дел од репрезентативците на Украина доаѓаат од домашните клубови, иако најдобрите играат во странство. Украина би можела да состави тим за да ѝ се спротивстави на Шкотска, но тоа би бил преполовен состав, без некои клучни играчи кои настапуваат за киевски Динамо и Шахтар.
Затоа, Украинската фудбалска асоцијација (УАФ) упати официјално барање до ФИФА за одложување на баражот против Шкотска, закажан за 24 март на „Хампден Парк“ во Глазгов.
ФИФА објави дека ќе се обиде да најде соодветно решение за настанатиот проблем, со оглед на тоа што одложување на овој натпревар ќе доведе и до одложување на финалниот бараж, а тоа значи дека еден европски квалификант ќе остане непознат на жрепката за завршницата закажана за 1 април.
„ФИФА изразува најдлабока солидарност со сите погодени од она што се случува во Украина. Наскоро ќе објавиме што понатаму“, кратко истакнаа од светската куќа на фудбалот.
Домаќинот на баражот, Шкотска, се понуди да ѝ помогне на УАФ за натпреварот да се одигра според планот.
„Фудбалот е незначителен среде конфликт. Но, ние го пренесовме силното чувство на солидарност кое допред до нас од шкотските навивачи и граѓани во изминативе денови. СФА упати поддршка до украинските колеги за нивните подготовки да минат во најдобар ред во оние незамисливо тешки услови“, објави Шкотската ФА.
Претходно ФИФА ја исфрли Русија од баражот, но Руската фудбалска асоцијација најави жалба до Спортскиот суд во Лозана.
Истиот ден кога Украина треба да игра против Шкотска репрезентацијата на Македонија го игра својот историски бараж на гости кај Италија.