Двајца изминатиов период се на удар поради слабата форма која ја покажуваат на теренот, а особено тешки удари доби ветеранот Хандановиќ.
Ултрасите на Интер, популарните Курва Норд, истакнаа три банери околу тренинг центарот „Апиано Џентиле“ во знак на поддршка за нивните фудбалери, напаѓачот Лаутаро Мартинес и голманот и капитен Самир Хандановиќ.
„Блиц на Курва Норд утринава во 'Апиано Џентиле'. Јасна порака за поддршка на тимот (и на поединците ставени на тапет од поборниците за уништвање) во најделикатниот момент. Да се биде сега, без ако и без но, е единственото нешто кое е важно. Енергија, самодоверба, решителност. ЗАЕДНО, тим и навивачи, до Победа!“, објавија навивачите.
Аргентинецот нема постигнато гол во Серија А од 17 декември 2021 година, а во другите натпреварувања постигна само 1 и тоа во Суперкупот против Јувентус.
Словенечкиот голман, кој патем има 37 години, периодов прими неколку голови за кои се смета дека се негова грешка. Особено оној против Сасуоло кога топката му мина низ нозете.
„Со сила се добиваат битки... со карактер се добива војна!!! Норд е со вас“, стои на првиот банер.
„Држи се Лаутаро, со тебе сме“, е пораката за аргентинскиот напаѓач напишана на шпански јазик (или попрецизно, на аргентинскиот дијалект).
„Самир: Не обрнувај им внимание, Норд е со тебе“, гласи пораката до Словенецот.
На последните три натпревари во Серија А Интер освои само 1 бод, а во меѓувреме загуби од Ливерпул во првиот осминафинален натпревар од Лигата на шампиони.
