Холандската полиција уапси шест луѓе откако откри шест товарни контејнери преуредени во импровизиран затвор и звучно изолирана соба за мачење со алати како клешти, скалпел и лисици, соопштија од Јавното обвинителство.
Властите наведуваат дека полицијата извршила рација непосредно пред употребата на собата за мачење, а потенцијалните жртви на време биле предупредени. Полицијата ги откри контејнерите минатиот месец во склоп на истрага покрената на основа на добиени податоци од шифрирани телефонски пораки користени од криминалци, а дешифрирани неодамна од француската полиција.
Полицијата во Велика Британија и Холандија веќе приведе над стотина осомничени на основа на дешифрираните пораки. Запленети се повеќе од 8 тони кокаин и откриени 19 лаборатории за синтетичка дрога.
Според полицискиот извештај, на 22 јуни е извршена рација на место во близина на холандско-белгиската граница, уапсени се шест мажи осомничени за киднапирање и држење заложници. Во оваа прилика се пронајдени и шест бродски контејнери кои биле претворени во импровизирани затворски ќелии, а во нив имало оружје, алати и лопати. Контејнерите биле опремени со камери за надгледување. Судот во Амстердам одреди притвор од 90 дена за приведените.
Властите велат дека истрагата за оваа криминална група е почната во април, а инспекторите го следеле нивното движење низ шифриран онлајн разговор преку EncroChat.