Познатиот холандски ММА борач Алистер Оверим е поразен со технички нокаут од Александар Волков во главната борба од синоќешниот УФЦ спектакл во Лас Вегас. Русинот се претстави во импресивно издание и најави борба за титула.
Ова беше најслабото издание во кариерата на Оверим, кој беше претепан во октагонот. Од самиот почеток на борбата доминираше Волков со прецизни удари и беше јасно во која насока се движи борбата. Оверим се обиде да се одбрани, но издржа само до втората рунда.
Волков со серија удари доминираше во втората рунда, па Оверим заврши на подот, по што судијата ја прекина борбата. Со оваа победа, Русинот стана сериозен предизвикувач во борбата за титулата.
„Откако видов дека Алистер почнува да крвави на лицето, знаев дека нашата борба нема да трае долго. Бев сигурен дека ќе заврши најдоцна во втората или третата рунда. Само чекав момент да го зададам вистинскиот удар и го направив тоа“, изјави Русинот по мечот, порачувајќи дека е дојдено неговото време и дека ја заслужува борбата за титулата на светски шампион.
