Во американската држава Тенеси, САД се родија близнаци од ембриони замрзнати пред повеќе од 30 години, пренесе BBC.
Се верува дека ова е нов рекорд за најдолго замрзнати ембриони, со успешен трансфер што резултирал со живородени деца.
Ембрионите биле замрзнати на -128 степени Целзиусови со течен азот на 22 април 1992 година.
Рејчел Риџвеј, мајка на четири деца од Орегон, на 31 октомври ги донесе на свет близнаците Лидија Ен и Тимоти Роналд Риџвеј. Според Националниот центар за донација на ембриони, приватна верска организација која досега има помогнато да се родат 1.200 деца од донирани ембриони, вели дека ова е нов рекорд.
Претходна рекордерка е Моли Гибсон, родена во 2020 година од ембрион замрзнат пред 27 години.
„Одлуката за посвојување на овие ембриони треба да ги смири пациентите кои се во дилема дали некој сака донирани ембриони создадени пред 5, 10, 20 години. Одговорот е да!“, вели д-р Џон Дејвид Гордон, кој го изврши трансферот.
Ембрионите биле од анонимен брачен пар, кој потоа ги донирал за да може наместо нив да ги користи друг пар без деца. На посвојување ембрионите биле дадени во 2007 година. Од Центарот за донација се надеваат дека оваа убава вест ќе ги охрабри и другите да посвојат ембриони.
Семејството Риџвеј има четири деца на возраст од една до 8 години.
