И мажите и жените имаат депресија, но нивните симптоми може да бидат многу различни.
Бидејќи мажите кои се депресивни може да изгледаат лути или агресивни наместо тажни, нивните семејства, пријатели, па дури и нивните лекари можеби не секогаш ги препознаваат гневот или агресијата како симптоми на депресија.
Покрај тоа, мажите многу помалку од жените ја препознаваат депресијата, зборуваат за неа и бараат терапија.
Сепак, лекарите предупредуваат дека депресијата влијае на сè поголем број од машката популација секоја година. Иако не е секогаш лесно да се препознаат, постојат одредени предупредувачки знаци кои укажуваат дека мажот можеби пати од депресија.
Славни мажи кои отворено зборувале за своето ментално здравје и борбата со депресијата се, меѓу другите, актерите Бред Пит, Џим Кери, Џејмс Франко, Рајан Рејнолдс, како и принцот Хари и олимпиецот Мајкл Фелпс.
Иако секој маж има различни симптоми во повеќето случаи, меѓу вообичаените симптоми на депресија спаѓаат:
- лутина, раздразливост или агресивност
- чувство на вознемиреност или немир
- губење на интерес за работа, семејство или активности кои некогаш го интересирале
- проблеми со сексуалната желба и перформанси
- чувство на тага, рамнодушност или безнадежност
- неможност да се сконцентрира или да запомни детали
- замор
- проблеми со спиењето
- промени во апетитот
- стомачни болки, главоболки, грчеви или дигестивни проблеми
- неможност за исполнување на обврските поврзани со работа, грижа за семејството или други важни активности
- ангажирање во активности со висок ризик
- потреба за алкохол или дрога
- социјална изолација.
Како што објаснуваат лекарите, не сите депресивни мажи ги доживуваат сите горенаведени симптоми. Некои може да имаат само неколку знаци на депресија, додека други ги имаат речиси сите.
