Тенисерите Рафаел Надал и Наоми Осака се прогласени за спортисти на годината и добитници се на Laureus наградата за 2021 година, додека актуелниот германски шампион во фудбал Баерн Минхен доби награда за најдобар спортски колектив, пренесе BBC.
Церемонијата на прогласувањето на наградите се одржа виртуелно во Севилја. За Надал ова е втор Laureus во кариерата, откако за првпат беше награден во 2011 година. Осака за првпат е наградена во нејзината втора номинација.
Баерн триумфираше по втор пат, седум години откако за првпат е прогласен за најдобар спортски колектив. Сепак, вечерта мина во знакот на тенисот, бидејќи Били Џин Кинг доби награда за животно дело.
Британецот Луис Хамилтон е награден за неговиот ангажман во борбата против расизмот, додека најдобриот египетски фудбалер Мохамед Салах доби признание за неговата општествено корисна работа.