Шпанскиот тенисер Рафаел Надал се пласираше во второто коло на Вимблдон откако го победи Аргентинецот Франциско Серундоло со 3-1 во сетови (6:4. 6:3, 3:6, 6:4), а по мечот одговараше на новинарски прашања осврнувајќи се на случаите со коронавирус кои сега се појавија.
Марин Чилиќ и Матео Беретини претходно отпаднаа од турнирот поради позитивен тест на коронавирус, а еден од присутните новинари констатираше дека на Беретини му е кажано дека може да игра доколку сака, но тој одлучил дека не сака да се натпреварува за да не дојде во контакт со другите играчи.
„Кога ќе се изговорат такви работи лесно е да се создаде конфликт, прво треба да бидеме сигурни дека постои основа за тоа. Доколку не се лажам, не се сеќавам на ковид случаи на Ролан Гарос. Ги немам сите информации за да изразам јавно мислење за тоа, но попрво не би зборувал за работи со кои не сум сосема запознаен. Информацијата што ја имам, а не знам дали е точна, е дека играчот може да одлучи дали сака да се тестира доколку има некои симптоми. Ако сакаш да се тестираш и тестот испадне позитивен, тогаш нема да играш. Но, вие сега ми кажувате дека можеш да продолжиш да играш иако си позитивен, навистина не знам. Единствено што знам е дека можеш да одлучиш дали сакаш да се тестираш доколку не се чувствуваш добро“, изјави шпанскиот тенисер .
Надал во второто коло ќе игра со Ричардас Беранкис.