Аргентинската тенисерка Надја Подороска се пласираше во полуфиналето на Ролан Гарос, откако по два сета ја совлада Украинката Елина Свитолина со 6 : 2, 6 : 4.
Подороска, која во моментов е 131 тенисерка во светот, за еден час и 20 минути стигна до победата над третата носителка.
Таа го одзеде сервисот на Свитолина осум пати и напиша историја во Париз.
Аргентинката е првата тенисерка која се пласирала во полуфиналето на Ролан Гарос од квалификациите. Во исто време, за прв пат во нејзината кариера се пласираше во полуфиналето на Грен-слем турнир.
Подороска е третиот квалификант во Опен ерата што се пласира во полуфиналето на еден од четирите најголеми турнири.
Во полуфиналето ќе игра против победничката од натпреварот помеѓу Италијанката Мартина Тревизан и Ига Швионтек (Полска).
