Откако Џек Грилиш стана најскап домашен играч во Премиер лигата, од него се очекува премногу, па каталонскиот стратег ја спушта топката.
Манчестер Сити летоска ѝ искешира на Астон Вила неверојатни 117,5 милиони евра за услугите за 26-годишното крило Џек Грилиш.
Откако првите 7 кола во Премиер лигата ги одигра како стартер, потоа неговиот статус почна да варира. Грееше клупа, влегуваше во второ, а некогаш беше и стартер. Веќе трет натпревар во серија нема влезено во игра, а вкупно сезонава во Премиер лигата одигра 17 од 27 натпревари, од кои на 7 беше заменет, а двапати влегуваше од клупата.
И на последниот натпревар со Евертон кога „Граѓаните“ се мачеа да го скршат отпорот на домашните, Пеп се сврте кон други играчи од клупата оставајќи го Грилиш да го догледа натпреварот на мира.
„Веројатно премногу слуша што велат другите“, вели Пеп алудирајќи на изјавата на Грилиш во декември кога рече дека „најважната статистика се головите и асистенциите, тие се оние на кои најмногу се посветувам“.
„Тоа е погрешно, но статистиката му е подобрена, а игра слично како во Астон Вула кога е во прашање контактот со топка“, додава каталонскиот стратег.
„Имаше шанси против Кристал Палас, за 20 минути можеше да постигне 3 гола. Не се случи, но некогаш ќе се случи. Не го купивме за да дава 45 гола по сезона“, категоричен е Пеп.
„Денес е важно дали даваш сѐ од себе, дали им помагаш на соиграчите во дефанзива и во офанзива, тоа е доволно. Благодарение на тие работи ние победуваме. Сите имаат агенти или менаџери и што не, кои кажуваат сѐ и сешто, а играчите слушаат. Тој игра добро. Да не беше така, ќе му кажев“.
