Францускиот авантурист и каскадер Винс Рефет, познат по акробациите кои ги изведуваше летајќи со џетпек и карбонски крила, загина за време на тренинг во Дубаи.
36-годишниот Винс беше вработен во компанијата Jetmen Dubai, а со слава се стекна по летовите со џетпек над Дубаи и над Алпите. Деталите за неговата смрт не се познати, а полицијата води истрага за трагичниот настан.
Во текот на кариерата Рефет изведе бројни акробации меѓу кои и BASE-џампинг од Бурџ Калифа, највисоката градба во светот. Неговите акробации секогаш беа пренесувани виртуелно на социјалните мрежи.
Со колегата Фред Фуген, со кој изведуваше акробации во тандем, во одело со крила прелета рамна површина со брзина до 270 км/ч и со помош на постигнатата брзина се вивна 80 метри во воздух, за потоа и двајцата да ги активираат падобраните и безбедно да слетаат.
