Предводникот на „Црвените ѓаволи“ седи мирно на земја и покрај одличниот старт на новата сезона на неговиот тим и ентузијазмот дека конечно ќе се бори за титулата.
Оле Гунар Солскјер има одличен старт на сезоната и со 4 победи и 1 нерешена е на делба на првото место заедно со Челси и Ливерпул. Доаѓањето на Кристијано Роналдо дополнително ги загреа навивачите кои сега гледаат тим кој треба да се бори за титулата.
Синоќа Манчестер потврди дека има победнички менталитет откако славеше на тешкото гостување кај Вест Хем иако губеше со 1:0. Роналдо израмни, а Џеси Линдгард во 89. минута го постигна победничкиот гол. Длабоко во надополнувањето нововлезениот Марк Нобл промаши пенал откако Давид де Хеа го одбрани неговиот удар.
„Одиграни се само пет натпревари од сезоната. Веројатно синоќа бев пред отказ. Така функционираат работите во Манчестер Јунајтед“, вели Солскјер на новинарско прашање дали Јунајтед се бори за титула.
„Зсалуживме три бода. Тешко е да се игра тука. Се надевам дека овие поени ќе направат разлика. Што се однесува на титулата, ајде да видиме за тоа накај април-мај“, додаде тој.
„Мора да се браниме подобро. Мора да му направиме на противникот потешко да нѐ пробива. За примениот гол, поради некоја причина поставеноста ни беше лоша и ќе треба да поработиме на тоа“.
Тимот на норвешкиот стратег наредниот предизвик во има в сабота кога на „Олд Трафорд“ гостува Астон Вила.
