Принцезата Латифа ал Мактум, ќерка на владетелот на Дубаи, објави снимка во која раскажа дека ја држат во заточеништво и дека стравува за нејзиниот живот.
Во видео кое го снимила тајно во тоалет, принцезата Латифа вели дека нејзиниот татко Мухамед бин Рашид ал Мактум ја држи заточена во вила, која е всушност претворена во затвор.
„Секој ден стравувам за мојот живот, полицајци ми рекоа дека цел живот ќе бидам во затвор и никогаш нема да излезам. Секој ден се влошува мојата ситуација“, вели Латифа.
Видеото со принцезата го објави BBC, а властите во Дубаи не коментираат за веста. Во 2002 година принцезата се обиде да избега, па во снимка објавена во 2018 година на YouTube изјави дека сака да избега од земјата. Со солзи во очите наведе дека по првиот обид за бегство нејзиниот татко три години ја измачувал и ја држел во заточеништво.
Во март, 2020 година британското правосудство пресуди дека емирот на Дубаи наредил грабнување на неговите две ќерки Латифа и Шамса. Шамса на 18 години се обиде да избега од татко си во 2000 година, додека се наоѓаше в Англија.
Принцезата Хаја, која во 2004 година стана шестата сопруга на емирот, побегна во 2019 година во Лондон, заедно со двете деца.
Најновото видео на принцезата Латифа поттикна Обединетите Нации да покренат глобална истрага, а Велика Британија смета дека снимката е навистина загрижувачка.