Резултатите од нова студија на Универзитетот во Сао Паоло во Бразил откри зошто некои од луѓето се природно отпорни на новиот коронавирус.
Студија на парови во кои двајцата партнери биле изложени на коронавирус, но само еден од нив бил заразен, помага во расветлувањето зошто некои луѓе се природно отпорни на овој вирус.
Научниците веруваат дека ваквите случаи се ретки, но повикот на волонтери кои одговараат на тој профил резултираше со пријавување на околу 1.000 парови.
Во склоп на истражувањето се земени примероци на крв од 86 парови за подетална анализа.
Резултатите покажуваат дека резистентните партнери почесто имаат гени кои придонесуваат за поефикасна активација на таканаречени клетки природни убијци (НК клетки), кои се дел од почетниот одговор на имуниот систем.
Кога тие правилно се активираат може да ги препознаат и уништат заразените клетки, спречувајќи развој на болеста, објаснија научниците во студија објавена во Frontiers in Immunology.
„Нашата хипотеза е дека геномските варијанти кои најчесто се наоѓаат кај сопружникот подложен на инфекција доведуваат до производство на молекули кои ја инхибираат активацијата на овие клетки“, истакна Мајана Зац, авторка на студијата од Универзитетот во Сао Паоло.
Таа додава дека оваа студија не може да докаже дека тоа се случува. Дури и ако овој заклучок се потврди по повеќе истражувања, би требало да се истражи и придонесот, односно влијанието на другите имуни механизми.
